特技災難
獅子王 The Lion King
如果拎同系幾部翻拍經典嚟講，呢部係最唔好睇。唔係部戲出問題，係完美畫面，精制CG下就係得番個殼，邊睇邊諗到底係咪睇緊discovery channel 定動物世界？！可以話成也因為靚，敗也因為靚。中間睇到幾悶吓，始終你搞唔清係睇緊動物紀錄片定睇緊戲！靚絶既風景，背境既昆蟲，水，樹，雲，無一樣唔係同真無分别。當你投入到咁清優既大地時，係幾難唔瞓著！
故事上，可謂倒模咁吸出嚟。小獅子出生，闖禍，奸人害死阿爸再獨自出走，遇上好朋友，慢慢成長，醒過來回到大地重奪皇位，打倒殺父仇人。場景方面亦一樣，完美地神還原動畫版中既每一場戲。不能否認幾可亂真既CG，係對劇情上推進係幾有幫助，好似每一場動作戲，鬣狗既追逐，老豆既死，特别係最後辛巴同刀疤大戰一場，除咗我成個人醒哂之外，一個閃電打落嚟，木頭著火變成大火，成班群揪，打得好睇好多，絶對係比動畫刺激好多倍。另外辛巴慢慢長大咗，同與彭彭既戲又刻畫得幾有感情。不過睇見隻彭彭，成隻污糟立蹋，黑忟忟，又點會代入，點感動？動畫版真係cutie好多。
歌方面一樣有 Can you feel the love tonight，Hakuna Matata，Circle of Life等，回憶立即標哂出嚟，至於好唔好聽？就睇你個人了，我呢老餅梗係覺得舊版好D既。
主題上十分明顯，任何事要有經歷過，先可以真正成長，先會去明白承擔，或者遇上生離死別，但做事一定要有勇氣去面對，不要逃避。但唔知係咪人大咗，阿爸救阿仔，刀疤叫辛巴走咗就唔好再番嚟，我一絲感覺都無......
不能否認，由廿幾年前畫餐死既平面2D，進化成今日假的真得了，真得不得了既3D CG，但導演真係捉錯用神，只能講拎一大堆嘔心瀝血技術，去將一個經典用完美視覺特效留芳百世下去。 |
發表於 2019-7-18 02:48 PM
| 
