搬得郁　都要靚 Look

咪以為嬌滴滴靚女，擔擔抬抬唔慌做得來，錯！你睇時下唔少 Boutique、花店、Cafe嘅靚女老細都落手落腳，不假手於人。不過咁，做得靚女嘅搬運工具，賣相當然要講究， Hyundai呢部五前速自動波貨Van，內櫳闊落，操控簡易，外形仲靚到似私家車，公私兩用都唔突兀。

操控車仔化
全新自動波版 H1煞食在外形夠撐，貨Van都有咁嘅型格，超罕！搵食車型，內櫳當然超闊落，六座位加個大載貨空間，生意仔一次過入齊貨都無難度。最重要係全新五前速加減自動波，十足私家車仔玩法，好容易 Natural High。講咩呀？咪講 H1採用歐盟四型 2.5 CRDi柴油引擎，合乎保護自然環境嘅原則；車價低耗油低性能卻夠High。H1馬力輸出最高 170匹，扭力 40kgm，較市面好多貨Van更強，車身高又易睇位，加埋螢幕影音系統連彩色後泊鏡頭，後波都睇得一清二楚。副偈唔再放喺凳底而置於車頭，車廂隔音亦做得唔錯，估唔到坐喺貨Van內都可以好靜好舒服。內裝配備更似足私家車仔，大大張舒適厚座椅加大面板及彩「芒」，私家車貨車兩用一樣得，即使女人仔，自己動手搬貨搬屋都有靚車相助唔失禮啦，不過記得要係 2仔牌囉！

■中控面板設計精緻，似足 MPV車型。

■彩色顯示屏更附設多功能影音系統。

■彩「芒」仲連接後視鏡，泊車更就手。

賣相有歐味
時代變，揸貨Van嘅朋友揀搵食車，再唔淨係局限於日本品牌。雖然固有觀念認為，日本車二手價硬淨、車身零件易搵、好力又安全、改裝空間大等等，但不知不覺間韓Van已經跑上嚟，好似呢架 Hyundai H1，造工靚，載物量大，好力又慳油，家更有埋五前速自動波版本，使用更加方便易上手，莫講話東洋Van，隨時拍得住歐洲 Van質素，外形就似足平治 Vito，夠晒貴格，唔細心睇真，仲以為係私家車 MPV車型呢！Hyundai去年至推出H1貨Van，今年追加加減自動波款式。由於車款年資有限，二手價未明，不過新車有五年或十萬公里原廠保用，仲有$199,800預售優惠價，仲使乜花精神去搵二手筍盤？