Jazz 1.3EX× Trio Passion色相迷人

車都要講升呢，所以雖然 Honda嘅 Jazz近年喺小房車市場一直紅到爆，長賣長有，不過都依然要搞搞新意思，提升吸引力。今次嘅升呢花臣，係Jazz TrioPassion，大玩色相，紅色真皮座椅加埋閃爍電鍍，貴氣奪目。要吸引一街目光，代價只係二千大元，絕對超值。

升呢皮櫳

■打開車門，紅白對比效果一目了然，不過紅配黑似乎更有個性。

要講 Jazz最新款，到家都足足講咗年幾時間，老實講，睇外形，一啲都無 Out，不過要吸引力升呢，新鮮感都好緊要。所以今年代理就同 Jazz1.3EX大玩變身，由原本精緻但平實嘅車櫳入手，大膽嚟個火紅誘惑，雖然，誇張高調，並唔會係人人鼓掌，但不得不承認，火紅車櫳嘅Jazz一定更搶眼之餘，亦爆發火辣跑味。呢款升呢版 Jazz名叫 Jazz TrioPassion，標榜內櫳全改為歐陸時尚優質真皮座椅，唔喜歡火紅？仲有黑色同啡色供車主選擇。今次代理提供拍攝嘅紅櫳Jazz，就充份體現玩弄色相嘅迷人之處。車身係毫不搶眼嘅白色，但配上熱辣辣嘅火紅色車櫳對比鮮明，令人眼前一亮，品味出晒嚟。真皮座椅同門板皮料雖然全部在港加工，不過就柔軟度十足，設計仲真係幾有歐洲車座椅風格，至於縫製技術，更係值得一讚，車線位整齊有序十分精細，單睇個Look，一定唔會比原廠製作輸蝕。

1.細睇皮座車工，亦頗精細。

2.鬼面罩電鍍裝飾，肯定收搶鏡之效。

3.四門均有腳踏，同級數車較少見。

谷辣 1.3EX

■門板亦配上火紅色，整體提升貴氣。

要玩風格又點只咁少，代理似乎刻意為呢架本來已野性十足嘅小房車再加霸氣，喺車頭鬼面罩加上咗電鍍裝飾，效果如何見仁見智，但就無疑收到搶鏡之效，反而四個門邊嘅電鍍腳踏，就令人喜出望外。點解咁講？唔好唔記得呢個扮靚套餐只係二千蚊，皮座、電鍍鬼面罩同腳踏畀晒你，仲唔係賣大包？今次代理揀 Jazz1.3EX嚟改裝，絕對有道理，事關 Jazz 1.3EX外形上已經較 Jazz 1.3LX Sporty，1.3EX有晒車身擾流，鬼面罩鍍鋁裝飾、霧燈，加埋 16吋胎軨，外形夠晒煞食。仲有嘅係，佢絕對係部睇得又劈得嘅車仔， 1.3公升i-VTEC環保引擎配五前速自動波箱，軚環仲有埋加減波撥片，操控味甚濃。多得 i-VTEC之助，喺2,000轉左右已經有足夠力水，試車時故意谷到 3,000至 4,000轉睇吓佢嘅反應，結果喺大斜路表現都綽綽有餘。而係人都知Jazz係慳油之選，點踩都係一蚊幾毫一公里，點揸都唔會肉赤。