朱古力 Benz 甜入心

Benz 全新 E-Class 到港，上次試完 Coupe 版嘅跑味後，終於輪到四門豪房版登場。雖屬同一車系同一車款，但四門版絕不單止比 Coupe 多兩道門咁簡單，波棍歸埋軚盤右方，轉波都可以手不離軚，揸得輕輕鬆鬆。仲有大量置物位，體貼窩心。加上 E-Class 首度採用嘅朱古力色，齋睇已覺甜到入心。

■ 標準版已配 17" 合金軨，流露出老闆級座駕嘅氣勢。

體貼誘惑
熱門車款配熱門顏色，黑白銀灰實在睇到好悶，難得 Benz 最新旗艦級 E-Class 大膽創新，其中屬四門嘅 Elegance 版，就採用立立令朱古力色焗漆，望落帶點古典味但又不太沉悶老餅，最重要係底層隱隱透出金屬銀色，近望有點耀眼，整部E-Class 滲出香滑朱古力誘惑，忍唔住要用手輕撫車身，享受那順滑曲線美。

雖然車款相若，但 Elegance 跟 Coupe 比，分野其實好大。首先雙門變四門，每道門變得較輕，女士們輕力一推便可開閂，最重要係後排乘客上落都毋須再靠前面人士讓位，實在輕鬆得多。內櫳佈局方面，換上更大面積嘅桃木裝飾，整個內櫳真係好鬼 Elegance ，最特別係多咗儲物位，如前座中央手枕位，由於移走自動波波棍，廠方索性物盡其用，變成一層式置物位同雙杯架，緊隨其後嘅置物格一樣加碼，雙彈門式開關相當就手，前座座椅底下又隱藏另一置物格，你會驚嘆司機位附近居然都有咁多空間畀你擺嘢，體貼到如酒心朱古力般醉人。

■ 踏入炎夏，後座獨立冷氣風口更重要。

■ 雙天窗，前方玻璃更可向後打開。

■ 朱古力色為 E300 新加顏色。

■ 車窗拉簾又係 Coupe 版所欠缺嘅。

手不離軚揸全程
除四門及置物位外，不得不提波棍移位嘅設計。將本屬左手操控嘅中央波棍，移至軚盤右方變成軚波。起初可能有啲唔慣，打燈或開雨撥時會搞錯，又或轉波時會下意識望吓錶板，確認自己拍咗落 P 定 N 。但幾分鐘熱身後，已無適應性問題，連扭軚泊車向前倒後，都可以做到軚不離手，揸得零舍瀟灑！

上次試 E350 Coupe 時，好欣賞套咖啡警示系統，當行車不當時，系統會提你稍作休息，不過一架轎跑始終有埋軚波撥片先更 Perfect 。點知嚟到老闆級嘅 E300Elegance ，除咗咖啡系統依然健在之外，居然仲發覺 Coupe 所欠缺嘅軚波撥片，大老闆自己揸時，當然可以過吓轉波手癮，你會發覺 3.0L V6 新偈沉穩好力，帶點濃度達 80% 黑朱古力嘅刺激味蕾效果。就算係由司機駕駛，碰到老闆趕時間，心急到正想搵人鬧時，司機都可偷偷谷吓轉數，嗱嗱聲去到目的地放低老闆，反正E-Class 又穩又靜，就算拖波爆住去老闆都唔多覺。