[分享] 主場吞PSG兩蛋　曼聯陷出局危機

周三凌晨舉行的歐聯16強首回合重頭戲，曼聯主場以0比2負於巴黎聖日耳門，看守領隊蘇斯克查上任經歷10勝1和後首吃敗仗，賽事末段更有保羅普巴累積兩黃1紅被逐離場，陷入出局邊緣，次回合要收復失地困難重重。

PSG在尼馬及卡雲尼受傷下，今仗踢得份外謹慎，拉慢節奏避免同曼聯鬥快攻，此戰術明顯奏效，曼聯上半場難以組織埋門，更於28分鐘幾乎失守，基利安麥巴比單刀埋門，面對迪基亞射中網側。

曼聯兩位箭頭連格及安東尼馬迪爾於上半場末段均告拉傷，連格頂唔到半場被換出，安東尼馬迪爾於下半場亦退下火線，由阿歷斯山齊士及桑馬達入替，攻力再打折扣，而PSG下半場發動攻勢，53分鐘迪馬利亞開角球，派斯奴甘佩比門前無人看管撞射破網，領先1比0。

失球後曼聯大舉進攻，反被PSG一次突擊輸多粒，迪馬利亞左路傳中，基利安麥巴比門前撞射死角入網，客隊贏到2比0，之後基利安麥巴比再有單刀機會，但過唔到迪基亞。

賽事末段曼聯換入盧卡古強攻，但冇乜效果，反而保羅普巴於89分鐘攔截丹尼爾被指過勇，被罰第2面黃牌而領紅牌被逐，令破關乏力的曼聯陷入絕境，次回合普巴停賽之下更難有翻身機會。