足總證實有望再搞巴克萊亞錦賽
過往兩度（07及11年）主辦「巴克萊亞洲錦標賽」均大收旺場嘅香港，極大機會獲得該賽事2013年主辦權，而盛傳參賽球隊更包括億萬大軍曼城、前列勁旅熱刺、以及正為護級奮鬥嘅新特蘭。連同將喺出年7月底接受傑志挑戰嘅「紅魔鬼」曼聯，一眾香港英超迷有望喺明年暑假，一口氣現場欣賞到4支英超勁旅演出。
南韓搞唔成 破例香港連辦兩屆
足總昨晚發新聞稿，指「英格蘭超級聯賽會已落實來港舉辦『巴克萊亞洲錦標賽2013』的意願」，但參賽球隊尚未落實。據悉，因原定獲得主辦權嘅南韓未能如期舉行，因此賽會決定打破「不會連續主辦兩屆」嘅慣例，於來年暑假交由之前兩次主辦都十分成功嘅香港接手，並喺日前派員來港視察供參賽球隊練習嘅場地。儘管一切尚未簽約作實，但相信香港第三度主辦該賽事機會極濃。
傳熱刺取代史篤城參賽
有消息指根據「巴克萊亞洲錦標賽」賽例，就今季英超積分榜喺12月初排名，分開3截嚟抽籤及上屆參賽隊伍可免役下，賽會已定出來年3支參賽球隊，分別係上季英超冠軍曼城、現時喺英超榜排第9嘅史篤城，以及第15嘅新特蘭。本報昨就相關消息向足總求證，並嘗試查詢賽期、票價，以及賽會是否經協商後由熱刺取代史篤城東來等事宜，起初對方表示暫不作任何回覆及評論，但之後卻發新聞稿證實賽會來港舉辦該賽事嘅「意願」。
傑志唔驚影響鬥曼聯票房
假如香港最終落實出年主辦「巴克萊亞洲錦標賽」，一眾英超球迷當然雀躍非常，但本來喺明年7月底已主辦曼聯訪港嘅傑志，又會唔會因該賽事緊接其後而擔心票房受到影響？「我一啲都唔擔心，畢竟曼聯嘅吸引力唔係一般球隊所能及，而且『傑曼戰』嘅票價好抵睇，我唔認為一旦8月舉行『巴克萊亞洲錦標賽』，會對我哋構成影響，絕對各有各做。」傑志統帥伍健信心十足咁話。
網民建議取代賀歲盃
ncyaa：「希望英超挑戰盃永久落戶香港，以後每兩年一次，取代越（愈）來越（愈）無睇頭嘅賀歲盃。」
『救生圈』：「會唔會蝕啊？得曼城叫做有睇頭！不如索性係（喺）香港上演番場曼徹斯特打吡啦！」
Xingson：「……呢三隊嚟入座率真係幾大變數，雖然以波論波，呢三隊可觀指數其實比上年車維布更有睇頭更多好球員。」 |
發表於 2012-12-14 01:58 AM
| 
發表於 2012-12-15 11:44 PM
| 
發表於 2013-1-19 09:06 PM
| 