Maserati GranTurismo S MC Sport LineMix& Match　貴氣碳纖

黑色碳纖裝飾似乎早就同跑味掛鈎，我等窮車主，就會換吓碳纖頭冚，再慳啲又可以買張碳纖貼紙周圍貼，滿足一下跑車夢。不過眼見車價過百萬嘅瑪莎拉蒂將部車嘅碳纖裝飾玩得出神入化，當晚諗都唔使諗，就將自己車上嘅碳纖玩意統統撕下，免得獻醜。始終Supercar要玩碳纖，級數可以差好遠。

■配備 4.7升偈 V8引擎，充滿爆炸性。

今時今日，碳纖裝飾已經唔係飛仔車專利，連意大利名車瑪莎拉蒂都竟可推出以碳纖為主嘅套件，呢套 MC SportLine可以套用喺品牌旗下多個車款，可想而知絕對能登大雅之堂。梗係，作為 Supercar，當然唔係求其加一兩件碳纖料喺車度咁簡單，據講 MCSport Line系列係由瑪莎拉蒂旗下賽事部門（ MaseratiCorse）精心打造，務求令本來貴氣十足嘅外形更具跑車風格，而喺碳纖套件配合下，仲可以增加爆發力。車廠今次就揀選咗佢哋嘅旗艦車款 GranTurismo S示範 MC Sport Line呢套傑作。

點綴別出心裁
配備 4.7公升 V8引擎，擁有 440匹馬力，扭力去到 490Nm嘅 Gran TurismoS，無論從外觀或者性能睇，都係好多人心目中嘅夢幻跑車，今次別出心裁以碳纖裝身，更係叫人耳目一新。眼前純白色嘅 Gran TurismoS，喺灰黑色碳纖套件點綴下，更顯霸氣及侵略性。碳纖組件先於車頭發功，白色車身令碳纖下擾流板更形矚目，而呢組分置兩側嘅下擾流板，更可以在高速時提供更佳嘅下壓力。車身嘅側裙腳亦改為碳灰色，令整體風格更為統一。車尾則有碳纖尾翼呼應，實際作用係，喺高速時提高行車穩定性。碳纖側鏡見得多，最出人意表係兩個碳纖車門把手，無疑帶嚟不一樣嘅視覺享受。車廠更將原來嘅電鍍窗框、兩側嘅死氣喉統一為黑色，20吋黑色胎軨，配上鮮紅色嘅煞車卡鉗，造成色調強烈對比，十分搶眼。

外觀……

1. 一小片碳纖尾翼，低調，但依然矚目。

2. 死氣喉改為黑色，跟碳纖化玩法配合。

3. 胎軨與煞車卡鉗大玩紅黑撞色。

4. 窗框由原來電鍍改為黑色。

5. 碳纖門把， Supercar少見。

6. 碳纖側鏡屬大路玩法。

碳纖撥片玩到盡
車身與內櫳風格當然要一致，進入內櫳，不得不承認，視線所及，種種配件都散發濃烈跑味，卻不失豪華感。由門板裝飾、中控、儀錶板，都統一採用碳纖質料。其中最搶眼嘅要算軚環，竟連換檔撥片亦被碳纖物料佔據，諗都無諗過玩碳纖可以玩到咁盡。事實上真係要讚賞設計師嘅諗頭，灰黑色碳纖與車內閃亮嘅電鍍裝飾配搭得宜，未有因為遷就跑味而降格。作為豪華跑車，當然以豪味掛帥，中控嘅佈局、真皮座椅細緻嘅縫製手工，盡顯豪格。 Gran Turismo S MCSport Line，絕對唔係得個睇字，事關它配用了瑪莎拉蒂全新開發嘅懸掛系統，而且車身較原來嘅 Gran Turismo S低了10mm，令操控性及貼地嘅跑車駕駛樂趣相應提高。

內櫳……