無限變身　小魔怪 Jazz

喺香港熱賣多年嘅 Jazz仔，真係通街隨處見，但外形猶如小惡霸嘅變種 Jazz你又見過未？換上仿無限 154 WIDEBODY嘅大包圍套裝，外在辣味率先加強 10倍，配埋一身鋁合金Bar、點火放大器及電子增強器等裝備，內在馬力操控同樣倍增，呢隻忽然變身嘅小魔怪，原來已經係第二次大整容，Jazz嘅可塑性，實在令人好驚喜。

獨家大包圍變惡霸

■極貼身嘅桶椅包圍得十分貼服，對於有咁強嘅操控同馬力嘅小魔怪就最適合。

貴為 Honda車系中銷售王嘅 Jazz，車仔細細夠可愛又慳油當然係第一大賣點，雖然08年尾先推出嘅全新版本經已將外形及力水升級，但始終通街都係，略嫌平凡。不過 Jazz嘅另一大優點，就係「善變」，好似呢部Jazz就變完又變，今次換上參照無限 154 WIDE BODY嘅獨家大包圍套裝，頭尾沙板有立體線條加強肌肉感，前後Bumper連大包圍更有霸氣，加埋碳纖頭冚及頂蓋，惡霸辣味出晒嚟，再唔係平日可愛造型嘅細路仔。有頭威又點可以無尾陣，換上極限17吋白色胎軨，好睇又好片，但一定要配上 Federal TireSS595超薄身輪胎，如果唔係就會刮沙板。再數，有外又點可以無內，睇見一對日本 Bride限量版碳纖桶椅，絕對就係車手嘅象徵啦。

加強點火勁過 Turbo

■變臉後嘅 Jazz，線條感強烈，賣相十足小魔怪。

要細路仔跑得快，唔係買對跑鞋畀佢就得；要車仔鍊得吓，當然一樣唔可以淨係換條軚。呢架小魔怪嘅加裝鋁合金Bar，數目多到真係有啲嚇親，頭、頂、尾、底四支，加埋鋁合金六點式底架，遇到龍捲風都真係未必散，操控固然特別好。要加強爆炸力，仲有點火放大器令汽油燃燒更徹底，再換埋鋁金合皮帶輪偷輕車身，電子整流器令起步反應更快，唔使加 Turbo都一樣有排玩。揸得快時亦要識得收，Jazz較弱嘅制動系統一向係唔少人愛改裝嘅地方，換上迫力碟、迫力膠，都係令煞車系統反應力倍增嘅方法。外觀性能都全面惡魔化，坐上司機位嗰個唔想片番幾轉先奇。

1.車頭正面嘅電鍍鬼面罩尤其搶眼，驟眼睇都估唔到係 Jazz。

2.車底裝上鋁合金六點式底架，令車架更有柔韌性。

3.車尾沙板上方微微凸起，後方有三角形風口裝飾，似機械戰車。

4.白色胎軨 17吋去到盡，不過要配超薄輪胎先唔會刮沙板。

5.全車裝上唔少鋁合金 Bar，頭冚內一樣有。

6. E-Power電子增強器，提升性能。

7.中控上加裝油溫錶、水溫錶連錶座，型仔之作。

變身重點型 Look

參考 Mugen款 154 WIDE BODY大包圍$19,999/套特注碳纖車頂$2,800GE 8Sport特注碳纖頭冚$2,800Mugen油溫錶、水溫錶連錶座$6,580BrideCURA碳纖賽車椅（限量版）$16,000/張Bride車門飾布$3,000/一套四塊

提升性能
E-Power電子增強器$1,800DSIS點火放大器$2,800Federal Tire SS595輪胎$3,000/全套WorkEmotion 17吋胎軨$10,000/全套Summit鋁合金六點式底架$1,800全車 Summit鋁合金 Bar$3,978

改裝查詢：Spec-R（ 2362 8007）