易泊兼慳油smart過聖誕

收到聖誕禮物當然開心，但如果有人送部車畀你，在油價高企下，對方都係玩你居多。不過若然部車係 smart fortwo cabrio passion又唔同講法，因為佢出名慳油又的骰，外形仲紅噹噹聖誕氣氛爆燈。今日貌似Kelly的模特兒Andries，就收到呢份夢寐以求的禮物嘞！

油價下調養車易
部車邊個送，Andries雖然唔肯講，但笑到見牙唔見眼就係事實。事緣佢一直希望有架車，但年初因為歐元匯率高企，車價水漲船高，而近期隨住匯率及油價都掉頭回落，佢亦已蠢蠢欲動物色車款。「我好鍾意細車，因為容易揸嘛，所以好早已經睇中smart仔，佢各項條件都合晒我心水，最重要係近日油價不斷減，養車負擔相對地低咗，所以我正準備買車o架！」

低耗油量贏晒
smart 仔推出市場已有10年，由於引擎容積唔大，耗油量低係人都知，但其他「料」又夠唔夠呢？它配上一副直三引擎加渦輪增壓，最大馬力可達84匹。需知道一般四門房車的馬力約為100匹，以smart之身形而有此馬力，實在應付有餘；加上五前速自動波，揸smart其實跟一般房車冇乜分別。最重要係車主都關心的耗油量問題，smart的綜合耗油量為4.9L/100km，如果以截稿前油價計算，行車每公里只需要$0.61，呢個耗油量對於好多車主來說，真係恨死隔籬。

泊位方便最實際
講番呢位新車主，其實佢已經揸咗smart fortwo cabrio passion三日，佢話已經感受到smart仔的好處。「我牌齡唔耐，揸車經驗又少，一講到泊位或者係去銅鑼灣呢類人多車多嘅地方，我就好驚。但係揸 smart就有個好處，我相信香港唔會搵到一個街上嘅車位窄到佢泊唔到，所以呢排我泊車都可以一手軚就搞掂，仲勁過火鍋店門外嘅專業『泊車員』！講到去銅鑼灣上樓停車場就更加冇難度啦！另外，部車嘅開篷設計我都好鍾意，佢連A柱上嘅橫桿都可以拆埋，陽光普照下遊車河就啱晒啦！」

規格表
車型：兩門兩座位開篷車
引擎：直三SOHC配渦輪增壓
容積：999c.c.
最大馬力：84bhp/5,250rpm
最大扭力：12.2kgm/3,250rpm
驅動：後置引擎、後輪驅動
傳動：五前速自動波