馬季過了三分一，梁家俊僅得4W，對上一次贏馬已是10月中「你知我心」，陷入頭馬荒兩個多月。面對劣境他也不敢怠慢，聖誕期間留港課馬，希望努力有理想回報，周日2014年壓軸戰，俊仔便對「琪麟穎」寄予厚望，贏咗馬，就可以同女友阿Kit開心迎接2015喇！
今季暫得4W的梁家俊，已經有兩個多月未有贏馬，正處於低潮期，周日上演2014年最後一戰，他坦言希望能及時打破悶局，迎接新一年的來臨，其中出爭新馬錦標的葉廐「琪麟穎」，俊仔充滿憧憬：他說「『琪麟穎』現時只是三歲，走勢依然有些稚嫩，但上仗條件賽1400米排14檔仍能追入第三，表示面對同齡對手，仍具一定競爭力。今次再跑同程，對手同樣是三歲，繼續面對上仗冠、亞軍『藍天飛馬』及『飛來猛』當然不易應付，但若然『琪麟穎』排檔改善，又有不同睇法，絕對有力一撼。長遠來說，『琪麟穎』日後增程至一哩會有更佳表現。」
北非諜影再攻直路賽
出自師門蘇廐的「北非諜影」，上季在1400米打開勝門，上仗改跑1000米無功而回，今次再攻直路賽，梁家俊認為可以畀多次機會，他說：「『北非諜影』過往跑1400米成績較好，上仗縮程角逐直路賽，看似嫌短，但中段走勢甚勁，若非途中連番受阻，有權跑入前列，今次再跑同程，有權取得突破。」 |
發表於 2014-12-26 04:09 AM
| 