一個財政懸崖問題，搞到投資者十分忐忑，佢驚奧巴馬同共和黨人傾唔掂數，解決唔到問題，最終要跳崖拖垮美國經濟。美股自大選以後一直係咁插，杜指累計已經跌了近1000點。財政未跳崖，股市已率先跳崖，已經成為驚醒美國政客回復一些理智的警鐘。
上周五，白宮與國會繼續就解決財政懸崖問題談判，美股朝早腳軟軟，之後有參與談判的國會領袖表示，此次會談「具有建設性」，大市即刻醒番，由跌轉升。杜指升46點，收12588點，標普500指數漲7點，造1360點，漲幅為0.48%。大市上周五雖然升得唔多，全周計仍然下挫近1.5%，但終於扭轉漫長的跌勢。
據《華爾街日報》報導稱，在與美國總統奧巴馬會談之后，議院議長、共和黨的博納(John Boehner)與參議院多數派領袖里德(Harry Reid)表示對達成框架協議持樂觀態度，並且認為這次會談有建設性。議院少數黨領袖、民主黨佩洛西(Nancy Pelosi) 亦表示，希望在聖誕節前解決財政懸崖的問題。市場估計政府會採用規模較小的、有目標性的支出削減措施取代廣泛的減支措施，稅收方面，會繼續延長中下階層稅務優惠，預計有錢佬加稅在所難免，只係加幅幾多及如何定義「有錢」而已。奧巴馬認為年入超過25萬美元就要加稅，共和黨則認為「百萬富翁」（millionairs）才需要加稅。
雖然在野共和黨和執政民主黨睇法還有好大差距，但令市場稍為樂觀的有兩點，第一，共和黨博納願意同總統傾政府收入問題，而不像過往那樣只談支出，只叫政府削開支，唔講任何加稅建議，即係有得傾。第二，兩黨都好似話唔使拖到年底才解決。咁又係，年底係聖誕節係老外大節，反正要解決，何必玩到自己無假放。
財政懸崖問題有轉機，市場醒一醒。股市「恐懼指標」VIX指數大跌近9%至16.41。不過，唔係所有人都咁樂觀。PNC公司的頓尼根認為：「每次情況大好的時候，總會有人出來攪局。今天我們算是看到了一縷陽光，但接下來其他人的評論可能會令局勢驟變。」而匯豐控股股市策略全球總監埃文斯(Garry Evans)表示：「企業行為尚且難料，更何況政客？」談判還會持續6個星期，「靜觀其變並採取避險立場，不失為理智的選擇。」事實上，歐洲經濟愈來愈差，希臘危債又隨時爆煲，加上中東局勢又再度緊張，外圍環境咁壞，投資者都好難樂觀也。
我就話美市會繼續忐忑，唔好樂觀得太快，呢市唔易炒也。 |
發表於 2012-11-19 11:43 AM
| 
