今年係政治市，而呢個禮拜就係「戲肉」。市場憧憬十八大後新一屆政府會送大禮，啟動新一輪刺激經濟措施，內險股唔多跌得落，國壽（02628）及平保（02318）均逆市靠穩。總而言之，呢一刻入市好有過大海賭大細嘅感覺，但賭仔偏偏樂於參與呢啲咁刺激嘅大場面，睇下嚟緊好淡友邊一方冇櫈坐！
市況偏軟，但唔少板塊起動，如光伏股，保利協鑫（03800）及卡姆丹克（00712）分別升7%及8%；燃氣股新奧（02688）、中油燃氣（00603）及中燃（00384）升3至6%。本來阿莊話等回到3.8至4元先翻兜中燃，點知眨眼上番4.53元，照計橫行咁耐升浪冇咁快完，若然手持嘅中傳動（00658）仲未突破，會考慮轉博中燃。此外，北方轉冷，波司登（03998）真係嚟料，升3%，收報2.55元，短線見五十二周高2.68元，可以先行食胡。
升市人人都爭買重磅股，反而市況整固，弱勢股有機會發圍。富士康（02038）獲大行調高評級及目標價，股價發力衝到上全日高位3.84元，收報3.6元，升幅31%，成交達到8.27億元，技術上250日線阻力喺3.98元，成功破位就要睇番四月份嘅下跌裂口位4.25至4.45元，但大行所講嘅iPhone訂單效應係咪真係咁厲害，阿莊都有啲保留，呢啲位唔建議高追。不過，由於富士康一洗頹風，連隻手機電池生產商比亞迪電子（00285）都跟住行，升幅22%，而同系話有意推電動車零首期上會嘅比亞迪（01211）則升3%。
中資食品股現強勢繼續睇吓弱勢股，近期中資食品股氣氛唔錯，好似隻旺旺（00151）同統一（00220）股價都迭創新高，經已泊得中糧大碼頭嘅蒙牛（02319），與歐洲乳製品企業Arla Foods建立長期戰略合作關係後，正努力整頓上、下游資源，目標喺年內籌建八至十二個大型牧場，一五年實現百分百牧場原奶來自規模化養殖牧場和社區嘅目標。
事實上，過去乳品出事，多半與原奶質素有關，蒙牛對症下藥，朝正確方向發展，而中糧作為大股東，亦有助挽回消費者嘅信心。今年中期業績倒退，皆因匯兌及應佔聯營公司虧損等因素所致，料一三年度純利可恢復增長，現價一三年度預測市盈率17倍，相比喺其他食品股，顯然係仲未發力，股價以大成交升穿24元關自見真章，建議耐心作中長線收集，以一三年度預測市盈率22倍計，合理價30元，止蝕位定在21元。 |
發表於 2012-11-7 02:39 AM
| 
