勵晶（ 575）有得諗。勵晶最新揸嘅現金連高流動性資產，總值近 4.3億（港元．下同），完全無負債，相當每股 0.11元，係現價 0.27元嘅 40%，已經好吸引。而隨着集團就出售准東煤炭項目一事，總代價 5.2億元，順順利利係下個月前搞掂，勵晶銀彈庫進一步充裕，肯定成為現金牛企業。
而勵晶最新 NAV每股 0.45元，現價折讓近 40%，資源股當中，呢個折讓水位，算係唔錯。勵晶 2010年半年度蝕咗近 1177萬元，但集團呢期剛公佈，實現投資變現，減持澳洲焦炭商 Bathurst部份股份，獲利上 5800萬元。照計，全年度已經可以穩賺。
呢期所見，細價資源股異動，短炒勵晶，博翻半番到 0.4元，都未上到 NAV水位。蒙古投資殘到痹
蒙古投資（ 402）前身明興水務，呢期變身投資搞蒙古礦業，連資產收購後嘅備考 NAV每股 0.29元，現價 0.171元，企喺 1年低位，殘到痹，另相對 NAV折讓，亦高達 40%，相當吸引。再講，呢次收購代價，透過以發行股份及承兌票據支付，但每股作價講緊 0.22元，而集團現價，亦係潛緊水。呢轉短打，博蒙古投資上番 0.22元，現價潛在回報率 29%，亦未有耐上到 NAV。 |
發表於 2010-10-10 07:05 AM
| 