[香港] 號召收集廢電器送黃錦星辦公室

「四電一腦」生產者責任計劃實施超過一個月，地區人士經常發現有相關廢電器被胡亂棄置喺街上同垃圾收集站，據報近日更有蔓延棄置至郊野公園嘅個案。
政策被批未從市民角度出發
中西區區議會副主席陳學鋒近日都喺社交網上載廢電器被棄置街頭嘅相，仲留言「召喚黃錦星局長」，引起網民熱烈討論，西貢區議員李家良亦留言，揚言發起收集街頭四電一腦，送去環境局局長黃錦星辦公室。若大批網民響應號召，睇怕黃錦星都幾頭痕。

網上近日熱議「四電一腦」計劃，但似乎都毀多於譽，有網民寸爆政府高官屋企大，舊雪櫃放喺度幾耐都得，但小市民住嘅面積細，根本冇空間將舊電器擺喺屋企幾日等人回收，批評政府制訂政策時冇從市民角度出發，先會造成依家周街棄置舊電器嘅局面。
亦都有網民話，政府環保政策向來係增加庫房收入，但係結果就導致街上垃圾有增無減，「四電一腦」計劃最終結果只會令全城滿地垃圾。「四電一腦」計劃畀大批網民鬧到體無完膚，唔知黃錦星會否諗辦法扭轉網上世界對計劃嘅負面觀感呢？

收藏分享評分

回復引用

訂閱 TOP

CC517