http://www.on.cc/hk/bkn/cnt/news/20150816/bkn-20150816090008981-0816_00822_001.html
这个呢?
内容如下....
【on.cc東網專訊】 邊個話小朋友先鍾意填顏色?近日,一本專為成人而設嘅填色畫冊《秘密花園》(Secret Garden)紅遍全球,令填色熱潮由英國吹到嚟香港,俘虜一眾妹豬、OL同亞豬媽,通通化身園丁,每晚匿喺屋企密密填。個個都潮畫呢本填色冊,甚至有人畫到上癮,搞到頭暈作嘔,究竟呢本填色冊嘅魔力有幾驚人?沉迷中同心思思嘅你,應該如何是好?即刻逐一拆解。
【減壓神器】呢本人氣填色畫冊,出自英國著名女插畫家Johanna Basford手筆,2013年喺英國倫敦出版。畫冊以《秘密花園》為名,畫滿密密麻麻嘅花海、小鳥同蝴蝶,但只有線條無顏色,等讀者發揮創意自行填色。神奇嘅係,讀者覺得填色畫冊有治療力,令人喺填色過程中,達致減壓、消除焦慮嘅功效。
【風靡全球】畫冊喺英國出版至今,已經加印咗7次,銷量驚人,之後仲出咗30幾個國家版本,全球銷售超過300萬本。呢股填色熱亦喺今年傳到亞洲,有台灣出版社喺3月時,出版咗中文版《秘密花園》,然後登陸香港多間書店。商務印書館企業傳訊部副經理梁麗嫻就話,書店2年前就有英文版賣,反應只係一般,但自中文版推出後,連帶英文版都開始熱賣,經過上月書展宣傳後,填色熱就再炒起,單係中文版已賣出近千本,喺書展中更是暢銷榜頭3位。
【版本多多】《秘密花園》備有中、英甚至韓文版,價錢同印刷都略有分別。以商務印書館為例,中文版售價93蚊,價錢較英文版相宜,除畫冊外,仲貼心地附送一本袖珍版「秘密花園」,等讀者可以帶出街隨身畫。追求原汁原味嘅「園丁」,就可以揀英文版,價錢會貴啲,賣160蚊。原著插畫家食住個勢,今年再出新畫冊《魔法森林》,中文版8月中會喺台灣推出,預訂反應亦相當理想。
而一間南韓化妝品店Here We Seoul喺七月尾亦引進韓文版,《秘密花園》同《魔法森林》各售150蚊,會員可享9折,即係135蚊。「真係想買都買唔到,我哋都係過咗炒風之後先買到!」店主Livana話,2畫冊至今合共賣出超過500本。連佢自己都迷上填色,每逢周末就留家填色,「試過一填就4、5個鐘。」本身係化妝師嘅佢就鍾意用木顏色加水填色,填出漸變、層次嘅效果。
【適可宜止】對於呢個花園熱潮,藝術治療師董美姿解釋,填色具治愈力其實有根據,都市人精神壓力大,容易感覺緊張同焦慮,呢啲情緒都係大腦嘅杏仁核發出嘅訊號。《秘密花園》中有蔓陀螺、禪修畫嘅構圖,藝術治療中都會用到相類近工具,「但藝術治療會較強調創作同表達,單單填色簿就未必做到,亦都唔算係治療。」
唔想畫到嘔?佢建議大家,填色唔應該超過1小時,每隔15至20分鐘,應轉換姿勢並讓眼睛休息。而在開始填色後,一般人會產生希望將填色完成嘅傾向,建議初試填色時,先選擇較簡單嘅圖案,假若一開始便填仔細複雜圖畫,當發現未能完成,反而會覺得氣餒,大家要切記。 |