拉登、喬布斯、卡達菲，再到雲妮侯斯頓，網民發現佢哋嘅死唔係咁簡單，背後都同一個人扯上關係；呢個就係阿仙奴嘅威爾斯中場艾朗藍斯。喺呢幾個名人死前，藍斯都會咁啱幫阿仙奴入波；如果一次係巧合，咁兩次、 3次、 4次呢？究竟藍斯入波係死亡預告，抑或佢係日本漫畫《死亡筆記》（ Death Note）入面，可以操控其他人生死嘅「奇拿」呢？
助兵工廠扳平 名歌星逝世
猶記得舊年 5月 1日下午，藍斯一箭定江山，幫阿仙奴主場贏曼聯 1:0，兵工廠球迷歡天喜地；翌日，到全美國人民熱烈慶祝，因為「恐怖大王」拉登俾美軍擊斃。之後到上年 10月 2日，藍斯幫阿仙奴入咗一球，但最後輸咗俾宿敵熱刺 1:2，兵工廠球迷非常傷心； 3日後，蘋果創辦人喬布斯病死，全球致哀。到 10月 19日晚，藍斯喺歐聯作客馬賽嘅分組賽射入奠勝球，助阿仙奴小勝 1:0；第二朝，利比亞獨裁領袖卡達菲就被俘虜，仲傷重死埋。呢個時候，已有球迷留意到藍斯嘅入球魔咒。
上周六下午阿仙奴作客新特蘭，梅迪薩卡受傷，藍斯後備入替；佢 75分鐘幫球隊追成 1:1，加上亨利補時絕殺，阿仙奴反勝 2:1。完場後，即刻有網民擔心會有名人逝世，同埋講笑討論邊個可能係受害者；點知咁啱得咁橋，名歌星雲妮侯斯頓喺上周六晚，俾人發現倒斃喺酒店內！
剋死喬布斯拉登卡達菲
如果話喬布斯之死嗰次相隔 3日太耐，咁淨係計拉登、卡達菲同雲妮侯斯頓，佢哋都喺藍斯幫阿仙奴入波後嘅一日之內死咗，真係唔好話唔信邪！相信藍斯都唔想呢啲事發生，佢自己試過喺比賽時斷腳，唞咗 8個月先可以踢番波，可以講係死過翻生；就算死嘅係奸商或者大惡人，話晒都係一條生命。網居希望藍斯可以繼續入波，但唔好再牽連國際名人死喇！
亨利好頭好尾
艾朗藍斯無端白事做咗奇拿，但佢嘅阿仙奴隊友亨利就啱啱相反，仲如假包換係球隊嘅救世主。今季季中， 34歲嘅亨利從美職聯紐約紅牛，以借將身份為阿仙奴效力兩個月左右，首次落場就做英雄，後備上陣入致勝球，幫阿仙奴喺英足總第 3圈贏列斯聯 1:0。上周六佢最後一次為阿仙奴踢英超，後備落場又做救世主，球隊贏新特蘭 2:1，得以較佳得失球壓過車路士，升上英超第 4名。踢完周中對 AC米蘭場歐聯 16強首回合，佢就會返紅牛報到備戰美職聯新賽季，到時希望佢可以有個完美句號啦！
|
發表於 2012-2-13 10:12 AM
| 
發表於 2012-2-13 11:14 AM
| 
咁夸張咩~
