[新聞] 黃雀行動截劫兩曼 巴塞叼走山齊士

lewistai

被視為今夏球員轉會市場最炙手可熱嘅球員、智利國腳阿歷斯山齊士，離開烏甸尼斯已經成定局，不過唔係加盟之前傳到好熱嘅曼城、曼聯或者車路士，而係黃雀在後嘅巴塞隆拿捷足先登。

唔夠錢買埋羅斯仔
之前好多傳聞講阿歷斯山齊士會投身英超，但估唔到巴塞隆拿突然成為大贏家，真係始料不及，始終巴塞贏咗歐聯冠軍後，今夏都只得 4,000萬歐元（約 4.4億港元）擴軍；而今次收購阿歷斯山齊士，據聞轉會費約 3,000萬歐元，即係話淨番嘅資金唔多，想搵多一位星級球員都幾難，之前傳出嘅基奧斯比羅斯，甚至法比加斯，如果真係要買，就必定要放走手頭上一啲球員，例如傳聞會買畀曼城嘅韋拿。
其實阿歷斯山齊士今次轉投巴塞隆拿，機會都相當高，因為呢位智利國腳已經獲得國家隊教練波基批准，離開大軍基地到巴塞隆拿傾埋轉會最後細節，希望佢搞掂晒所以轉會交易後，可以專心為球隊出戰美洲國家盃。至於阿歷斯山齊士同隊友講電話時亦提到，與經理人有共識後，話自己將會加盟巴塞隆拿，睇嚟今次轉會巴塞成事相當高。

山齊士身價 20級跳
另外，傳聞轉會費條件中提到如果阿歷斯山齊士喺美洲國家盃意外重傷，亦會有所轉變，保障番巴塞隆拿方面嘅利益。
今年 22歲嘅阿歷斯山齊士若果最終成為巴塞歷史上首位智利人，佢嘅身價真係何止 3級跳，因為 06年加盟烏甸尼斯時，轉會費只係 170萬鎊，如今升值差唔多有成 20倍，烏甸呢次都賺唔少。不過，呢位智利國腳上季的確係意甲紅得緊要，射入咗 12球，幫烏甸取得歐聯參賽資格。至於巴塞睇中佢，除咗球技好之外，身高只得 1米 68，正合晒巴塞前線專用矮仔嘅條件。