冠軍騎師莫雷拉上周日起孖後，今季頭馬數字已達143場，尚差兩W便追平上季紀錄，以他周日九匹座騎的實力，莫講話追平甚至刷新紀錄都不意外。
踏入五月頻有雷神搏失後唔放手之馬補中贏番，如「鑽之友」、「壯思飛」等，今戰便有「御風雲」、「財寶家駒」及「小米周」三匹同類分子；第四場的徐廐「財寶家駒」上次初跑1400米已得第二，同場季軍「翡翠紅星」再出率先補中，周日應輪到前駒贏馬開齋。
「財寶家駒」出自較新父系Hinchinbrook，牠服役時兩捷均在兩歲取得，子嗣都能承襲早熟特性，「財寶家駒」初出先在1200米熱身，再出即於同程後上跑第三，本身所造的1分9秒9時間較初出時快了近一秒，反映其進度良好，狀態越來越勇。
上場此駒首戰1400米，扳大頭配莫雷拉兼初戴頭罩，未知是否一下子未適應新配備，早段跑來欠缺前速，鞍上人大力催策才逐步上前，而且入直路後一度受阻，需向外移出取位衝刺，結果被沿欄慳位的「燈胆大師」佔得先機，輸唔夠一個馬位跑第二。
今次「財寶家駒」再跑同程，莫雷拉三揀一推掉「喜悅繽紛」及「常妙星」，「喜悅繽紛」是一出已有好走勢的蔡約翰質新馬，後駒則在自己胯下新勝，可見得雷神對上次搏輸「財寶家駒」唔多忿氣。
再加上四班1400米分拆兩組後，此駒被編在較弱的一組，全場馬得「相中有你」季內曾勝四班，但贏開泥地之馬轉跑草地惡唔出樣，更可避開冤家「燈胆大師」，各種因素配合下，「財寶家駒」大有機會贏馬取得首捷。 |
發表於 2016-5-28 02:18 PM
| 