[資訊] 瓦通紙砌凌志IS 會行會走識着燈

nt1972

有時藝術嘅嘢我真係識條鐵咩？好以凌志大費周章，搵嚟英國設計師同模型師，聯乘雷射切割公司LaserCut Works，再搭埋瓦通紙大廠DS Smith，幾大巨頭夾手夾腳用瓦通紙砌左架1:1凌志IS出嚟，除咗藝術之外都唔知講乜好喇。放心，係紙製唔係紙紥，貪大吉利是咩！呢部車用左7,000張10mm厚既瓦通紙，再以精準雷射切割出各部件形狀，再以極強黏合劑黐埋一齊，當然，骨子裏仍需金屬支架作承托啦。造型奇特出位唔在講，呢架紙製IS，居然仲識着頭燈，加上裝設左小型電池同摩打，仲可以載人周圍去添。駕駛艙亦模仿到有九成似真嘅IS，中控台上方仲有個紙做石英時計，相當搞笑。不過紙製IS應該經唔起落雨或行水氹嘅考驗，都係欣賞價值高於實用價值喇。