[香港] 減價逾半海洋公園推夜場平飛

減價逾半海洋公園推夜場平飛

暑假熱辣辣，夜晚出街就無咁熱。海洋公園8月1日至28日將推出夏日夜場優惠，喺呢段期間下午4點後入場，可享有超過半價門票優惠，每名成人收費168元，小童84元。海洋公園平日晚上7點半關門，到時周一至五會延長至晚上8點，周六、周日開到9點。

今次嘅夏日夜場優惠，比原價平大約一半，市民想享用優惠可以去7-Eleven便利店買門票，成人門票由原價385元減至168元，小童門票由193元減至84元。大家亦可去海洋公園正門售票處或網站買飛，但優惠少啲，成人門票售198元，小童99元。

海洋公園話，夜場優惠門票可當現金券用，手持成人門票嘅遊人，去樂園嘅餐廳、小食亭、「湖畔燒烤嘉年華」攤檔，消費滿50元，門票可當30元使用，而持有小童門票嘅遊人消費滿20元，門票可當15元使用。