4日 3夜跑山試 Tiida　靜雞雞執錢

日產全電車 Leaf下年登場，不過要喺香港普及唔係一朝一夕嘅事。近排想出新車，我會對有減稅優惠嘅Tiida睇高一線，事關啱啱同佢作四日三夜朝夕相對，先要讚佢行車時靜到似高級豪房，跑山時連風聲都唔多覺，而且電油偈好似Hybrid咁慳油，七毫幾一公里，名副其實靜雞雞幫到你慳錢。

七毫幾唔怕畀

■有尾 Sedan九月份賣贏無尾揭背版，證明三廂式仲大把人鍾意。

Tiida09款到港幾個月，一直都好想試吓咩叫 Green技術，點解唔用混能偈都攞到環保減稅。經過四日三夜操勞Tiida，分別以多燈位鬧市，以及快速公路大長途作測試重點，耗油大概分別約為$0.95/km及$0.75/km，１公升油最慳差唔多行到20km，比好多同級 1.5L私家車的確慳近三成，日日揸車返工嘅，真係體會慳得一蚊得一蚊嘅好處。 Green有乜叻？全靠新設計 1.5LHR15DE全鋁合金引擎，夠輕又有極高燃油效率。慳油第二功臣，係具智能系統嘅 XtronicCVT無段波箱，識按你習慣及路面情況而調節升、降波頻率。經實測後，基本上一個D波可以走勻港九新界，就算上飛鵝山或其他大斜路，都係吊住油門輕鬆攀爬，連個類似 OD波嘅 Sport掣都好少用。個人認為Tiida表現偏向斯文溫順，對我呢類急上急落嘅人，會稍嫌唔夠火氣。不過與其認為呢個係Tiida嘅缺點，不如話「車格」有所不同，新牌仔有老有嫩，要斯文要舒服嘅，絕對可對號入座。

■ 1.5L最低牌費， 109匹馬力中規中矩，跑山上斜未見吃力。

■燈位停車自動轉 N波，慳油途徑原來無處不在。

車廂大噪音細
Tiida全球銷量早已超越 135萬部，九月時亦成為香港 1.5L車中最好賣一部，優點着實不少，起碼揸咗幾日，對其高質皮櫳及真正闊落嘅車廂加唔少分。睇番15萬有找嘅同級車，大多太重膠感及過份簡約， Tiida就畀到頗高級嘅皮革＋仿麖皮內櫳，平車唔係事必等於Cheap。偌大空間亦令我呢個高佬坐得頗舒服，車頂夠高毫無壓迫感，就算身邊大肥佬同事陪伴同遊一整天，都讚個車廂闊落鬆動，難怪連美國環保局EPA，都將車廂空間定性為跟 Camry、 Passat同級嘅 MidsizeCar。車廂寧靜度比想像中好，隔音效果相當不俗，引擎聲、路噪、街外雜聲等，都被阻隔。 Tiida被日本評為六星級最高嘅安全標準，我最欣賞係Keyless Go同離子簇空氣淨化冷氣系統，呢類大有理由加錢當 Option嘅東東，一樣跟車送埋畀你，感覺抵上加抵。