人有三衰六旺，三屆香港冠軍練馬師方嘉柏，這晚賽前最近一次贏馬，數到上月2日在谷草由潘頓勝出大熱門「越影」，之後佢唔係唔搏，但就搏親都唔識贏，創下13個賽日不勝的個人紀錄。
卒之方嘉柏這晚否極泰來，跑到第七場三班一哩，旗下「勢必跑」夥拍潘頓企住6.7倍冇郁開跑，結果此駒單跑半條直路，從內欄慳位一竄而上，衝贏幾匹外叠馬先過終點，造就方廐重溫久違的贏馬滋味，組合獨贏開A2派34元正。
「勢必跑」取得今季第二Win，幫馬主蕭百君一吐佢名下生力軍「達羅素」早前晨操受傷的烏氣。不過蕭百君和兩位公子蕭劍平、蕭劍新均在外地公幹，由女兒蕭劍瑩和新抱代拉頭馬。方嘉柏表示快步速對「勢必跑」絕對有利，有3檔幫手亦是贏馬原因，由於此馬以往多次留得太後，後上不及，因此吩咐潘頓早段要喚醒該駒，騎者發揮十分出色。
今場閘前有東廐「開心駿馬」落飛變大熱，結果此駒全程走外叠蝕位無功只得第六，同場贏馬的正是「開心駿馬」騎師何澤堯師傅方嘉柏之「勢必跑」，認真巧合。
今場二至四名順序郭能「勇駒」、田泰安「睡得福」及雷神「有心人」，四重彩派五萬五千幾。 |
發表於 2016-4-21 01:30 AM
| 