[新聞] 鹿角冇退出日職4月23日重開

響日職因地震暫停後，有好多關於日職嘅謠言，又話呢個球季可能中止，又傳聞話鹿島鹿角退出。不過所有事都得到個答案喇！就係日職將會響下個月23號重開，至於受地震影響嘅鹿島鹿角亦率先響下星期一重新開操。
日職早兩日響東京開咗個臨時會，就係確定日職重開日期。雖然響會上對重開時間意見分歧，惟最後都定咗4月23日再開。不過就肯定唔會再打夜波，事關電力不足，佢哋以「公眾利益」為理由，4月嘅比賽都會打日波，而5月之後原則上都會打日波為主，至於延期咗嗰5周賽期，就可能安排改去7月打。
至於響地震受損嘅鹿島鹿角、仙台維加泰同水戶蜀葵，佢哋主場比賽可能再改期，但係若然都唔能夠如期完成復修，佢哋主場比賽就會改去東京嘅國立競技場舉行。
至於鹿島已經準備復操，佢哋下星期一就會開始練番波。另外因為地震延期嘅亞冠賽事，名古屋鯨魚對FC首爾，就定咗4月6日再展開。