公仔箱論壇 - Powered by Discuz! Board

標題: Prius冧足四日　心郁郁變節 [打印本頁]

作者: nt1972 時間: 2010-5-31 06:47 AM 標題: Prius冧足四日　心郁郁變節

於 09年中 Prius推出第三代時，已經覺得佢嘅吸引力的確比上一代大好多，曾經小試三日，已估計到佢嘅銷量可以不斷創佳績。今次代理再借出 Prius超級豪華版讓記者揸足四日續前緣，車廂嘅寧願舒適、操控嘅自然靈活、睇住油錶行極都唔跌嘅暢快，莫講話會令我呢類唔係成日揸車嘅女人仔不知不覺愛上佢，連一班揸開歐洲車嘅男性朋友都心郁，想變節投入 Prius嘅懷抱。

24/5陰尖沙嘴由頭到尾嘅設計都好有心思，格仔尾燈一樣咁靚！

睇住顯示屏先知，原來每次踩迫力都會叉電。

側鏡夠大得嚟又唔會感覺太鈍。

25/5雨海港城飛鏢形頭燈喺夜晚發光時仲靚！

■揭背尾廂夠高，摺埋後座可以變咗一張床俾我瞓。

經過 13年研發改良， Prius口碑一代勝一代，舊年試完之後都覺得第三代混能車其實已十分成熟。直至今年年頭由美國傳來不少關於 Prius嘅負面新聞，學杜汶澤話齋：「實在幾心痛。」有機會借來 Prius長測，二話不說答應，除想體驗呢部超級豪華版有咩唔同之外，或多或少亦想表達我對 Prius嘅信心。雖然亦有身邊朋友叮囑我小心萬一，但我照樣毫不客氣地揸足四日，出尖沙嘴睇戲、入元朗 BBQ以及去深井郊遊睇汀九橋，不論長短途都靠佢遊街影 Snap。珍珠白車身同帶點科幻造型嘅 Prius實在好夾，銀粉喺陽光底下閃閃發光嘅效果令 Snap Shot更 Sharp，最重要係比起純白色車無咁易污糟，啱晒我呢啲最怕洗車嘅懶人。新一代 Prius變得更流線，實在靚仔咗好多，唔會聽到有人話醜樣，加上超級豪華版獨有嘅全黑頂設計，令車身更具跑味，感覺時尚嘅 Cyber造型，更啱我揸去任何場合。

■全黑車頂係超級豪華版先有，襯白色車最好。

■ 17"車轆可以換炭灰色就 Perfect喇！

■真皮椅果然舒服啲，後座好闊落。

好心情周圍去嘅另一大誘因，當然係 Prius極慳油能力，入滿一缸油需約$500，油錶顯示十格為滿，望住個錶睇佢幾時跌，點知足足揸咗過百公里先跌一格。再次認真計一計唔用 Power模式嘅情況下，耗油量會係幾多。結果最佳油耗係 4.3l/100km，即係約 6毫子一公里，無咗怕油費貴嘅心理包袱，嗰種駕駛樂趣的確暢快得多，你試過就會明白。呢幾日亦有刻意留意煞車系統嘅反應，不論高速收油定係慢速踩 Brake，迫力都十分敏感。雖然佢以電能着車開車，引致欠缺開車嘅爆發力，但 Prius舒適嘅操控感、寧靜嘅車廂勝過不少豪華房車，嗰種揸車無壓力嘅休閒舒適，連幾個男性朋友最近都心郁想買架嚟代步。今次試呢部超級豪華版，多咗真皮座椅、 6CD音響、自動感光倒後鏡及前座有冷暖椅等，不過講到最實用就一定係 LED白光頭燈，光猛到以為開咗高燈，夜晚揸車睇前面一清二楚。

■中控台夠 Cyber又就手。

■最鍾意佢櫃仔又多又大，啱晒我。

Toyota Prius
引擎：1,798cc直四 VVT-i＋電馬達
馬力：136PS/5,200rpm
扭力：142Nm/4,000rpm
傳動：無段變速、前驅
售價：$304,314（超級豪華版）

27/5晴
同汀九橋影相，好在揸 Prius，去幾遠都唔覺累。

作者: taxi 時間: 2010-5-31 04:07 PM

點解你所有D post 全都無圖架!!!!!!!!!!!!!

作者: DAYDAY08 時間: 2010-5-31 06:07 PM

提示: 作者被禁止或刪除內容自動屏蔽

歡迎光臨公仔箱論壇 (http://os.tvboxnow.com/)