標題: Ractis藍戰士　大 Pat Pat [打印本頁]

---

作者: nt1972    時間: 2009-10-9 06:37 AM     標題: Ractis藍戰士　大 Pat Pat

英超開戰不久，紅魔鬼曼聯同藍戰士車路士鬥得難分難解，邊個係英超冠軍仲有排都未知，之但係車壇就殺出一部冠軍相十足嘅藍戰士加入細容積車種戰圈。咁有睇頭當然係實力相當，車仔細細卻高人一等；身形短小卻深度十足。一個空間大、變化多嘅揭背車尾盡顯非凡潛力，所講嘅藍戰士咪就係首次經香港代理引入嘅豐田Ractis囉！

極大自主空間
金融海嘯衝擊，好多中產人士買乜都計過度過，相反年輕一族豪買嘅習慣一定唔會分時候，所以唔少車行近排都主攻年輕人最愛嘅細車市場。呢部備受力谷嘅全新豐田藍戰士亦不例外，代理以「 Headroom for your style」作口號，介紹一部擁有極高大自主空間嘅Ractis。何謂極高大？咪睇佢車頭同一般可愛車仔造型無乜分別，其實車尾嘅方形大 Pat Pat就好似一架迷你 van一樣，極高大寬敞。由Echo Verso變種，感覺就好似縮水版嘅 Spacio，兩者都係以內櫳空間大作賣點，新一代 Ractis內櫳高度有1,365mm，個子幾高大都有排唔頂頭。要討年輕人歡心，日本味濃嘅外形已經輕取一分，車尾空間有如方匣子車仔般闊落又取一分，加埋車架特低，上落更方便，最適合車小狗四出郊遊，呢一點直頭有兩分啦。


■有本事大你嘅，係呢個超大揭背，而且車架貼地，令車仔嘅運載能力似足迷你 Van。

       
■後座輕易收納，一摺一推就變成一個特大低地台。

       
■尖頭方尾嘅設計都無損車身流線型線條，可愛又有動感。


■波棍設於一體式中控台上，觸手可及夠方便。

多變座椅有排玩
唔少年輕人買車，都係為載狗周圍走，Ractis嘅平台除咗低，仲夠晒大，可以輕鬆放得落幾隻金毛尋回犬，靈活多變嘅座椅設計實在應記一功。後座可以分兩邊摺起，變出一個特大平坦地台，前座椅背亦可向後調低，連接後座變成一張可以躺卧嘅雙人梳化。淨係玩內櫳變化都有排玩，正合年輕人愛靈活嘅要求，又加一分。內櫳設計唔算得上豪華，但勝在有智能車匙、倒車側鏡自動調校等同級獨有嘅高科技配備，又加分。驅動系統方面，有高性能低油耗嘅雙頂凸輪軸 16氣閥VVT-i引擎及轉波順暢嘅無段變速自動波箱亦夠搶分。安全方面， ABS防鎖煞車、EBD制動系統、同級獨有嘅八安全氣袋等，都係得分主力。全車各方面都有本事搶分，難怪喺日本大受歡迎，連香港代理都忍唔住親自出手，第一次引入Ractis。最後話埋你知，香港係日本本土市場之外嘅唯一外銷市場，如此馨香嘅藍戰士要大勝對手，我諗唔到有乜難度。



       
■ 7吋輕觸式屏幕連小盾牌外形嘅一體式中控台，簡約時尚。


■略嫌錶板設計唔夠搶眼奪目，只有簡單行車資訊。


■前置儲物箱收藏一條 USB插頭，方便播歌。

規格
引擎： 1,298cc直四 VVT-i
馬力： 87ps/6,000rpm扭力： 116Nm/4,000rpm
傳動：無段變速自動波箱
售價：$169,830（豪華版預售價）

---

歡迎光臨 公仔箱論壇 (http://os.tvboxnow.com/)

Powered by Discuz! 7.0.0