公仔箱論壇 - Powered by Discuz! Board

標題: 筋肉 SUV 拖郁兩架車 [打印本頁]

作者: nt1972 時間: 2009-4-3 12:54 PM 標題: 筋肉 SUV 拖郁兩架車

潮流興小巧，由七人車到 SUV 都有纖細版出現，凌志卻認為堂堂大車，點都要有番個格喺度。新版 LX570 搶閘登場，大水牛身形，車高近兩米， 5,700cc 巨肺引擎，拖重能力近 4 噸，加條麻繩真係有本事拖郁兩架車！

男人怒吼揸到出汗先過癮

■ 九成男人買車，都要經老婆同意， LX570 有本事兩邊都討好。

唔使講嘢！揸大牛龜 SUV 一定要夠台型，馬力扭力有咁大得咁大、車身有咁巨得咁巨、軚盤有咁粗得咁粗，再幻想自己係石屎森林中嘅奇連伊士活，一隻二隻小羊喺你腳下逃竄，腳下發力一蹬，攀山越嶺揸到出汗先夠過癮！ Lexus LX 車系將 LandCruiser 步大力雄精髓發揮得淋漓盡致，新版 LX570 繼續恃大蝦細，賣弄粗獷氣勢之餘，內功一樣 Level up ，將舊版 4.7L 一口氣谷至 5.7L ，扭力更加大至 530Nm，越野韌力驚人。拖重能力更由 908kg 增至 3,858kg ，搭埋 V8 引擎同 Daul VVT-i系統，有力得嚟亦比 LX470 更慳油，簡直有如史泰龍學識太極一樣，少少油已有雄厚馬力。

論越野驃悍性，可變式懸掛功不可沒，正常 Comfort 模式下，50km/h 掟 90 度彎，仍有輕微響胎及傾側，若跳至 Sport 模式，傾側角度明顯收窄，更唔會出現轉向不足嘅失控窘景。不過 SUV 跟真正越野車種有別，懸掛仍然偏向舒服為主，遇到凹凸路面唔會震到心都離埋，但想跟 Land Rover 類鬥 S 彎或 OffRoad ，始終仍有點距離。

■ 三種懸掛調校幅度，彎多路窄啱用 Sport 模式應付。

■ 尾廂勝在夠高，乜嘢球袋都擺得落。

■ 波棍下方大大粒掣，調校力度、車高、懸掛，賣弄越野性得有點高調。

■ 座椅軟熟，舒服過客廳張梳化，老婆趕你出房都唔驚。

■ 真皮、桃木及金屬配襯，方圓有致，力量同高雅合而為一。

■ 中排一拉就摺起，男人扮瀟灑，不費吹灰之力。

女人懶理
最緊要闊落舒服
話之你幾 Man 有幾 Powerful ，女人着眼點係內櫳。 LX570 車身大自然內櫳夠大，八人車，第三排一樣有番咁上下空間，坐足三件姊妹都仲可以郁手郁腳講是非啦。除咗大，仲要夠豪先唔失禮。全車真皮搭桃木裝飾，貴氣感跟越野車居然可並存。全車 19 個喇叭，用番凌志老拍檔 Mark Levinson ，聲靚唔在講，仲有 7.1 環迴音效高享受。另外，後泊鏡頭都係標準配備，有埋 GPS 衞星導航，但水貨關係不設香港地圖，要搵師傅裝番套 Software 先得。 LX570 有番 Lexus 力倡嘅 L-finesse 設計理念，車頭車尾變得貴氣兼有線條。講到價錢，入口商就始終神神秘秘話未定，我左索右索，估計約 130 萬上下，都算「豪」價。

■ 車大唔使怕，坐得高睇位有優勢，小女子一樣舞得掂。

■ 大長途車程，梗係男人捱眼瞓揸車，女人就舒舒服服瞓覺。

■ 識得掹車邊、踩門檻，就算車身高，上落一樣無難度。

■ 上下對開式尾門、後排座椅摺起等全部電控，仲送埋 Remote 畀你。

■ 車頂設 LCD ，中、後排乘客專用享受， SUV 中算少見。

規格
引擎： 5,663cc V8 DOHC
馬力： 383ps/5,600rpm
扭力： 530Nm/3,200rpm
傳動： 6 速 +/- 自動波，恒式四驅
售價：待定

作者: kelvinelf 時間: 2009-4-5 11:42 AM

thx for sharing

歡迎光臨公仔箱論壇 (http://os.tvboxnow.com/)