公仔箱論壇 - Powered by Discuz! Board

標題: 兩大熱門遇意外慘敗！容天鵬跑到季尾快活谷終於破蛋 [打印本頁]

作者: 02754566 時間: 2016-4-28 01:16 AM 標題: 兩大熱門遇意外慘敗！容天鵬跑到季尾快活谷終於破蛋

這晚最尾第八場二班1200米，兩大高手潘頓、雷神座騎「活力小駒」及「永旺年年」，谷草戰績都好好，順理成章做首次熱門。不過賽事早段，「活力小駒」唔知係自己外閃抑或受前面馬匹所影響，突然來個近乎失控的向外斜跑，亦令到在其最外側的「永旺年年」要勒避失位，搞到「永旺年年」幾乎墮退到馬群最後位置咁滯，兩大熱門兩敗俱傷齊落第。
結果今場落飛馬容天鵬馬房之「幸運歡笑」沿途前置早着先機，田草連捷後轉谷草再下一城，一口氣連贏三場，今場單Win及組合獨贏A2，分別派64.5及29元，容天鵬季內第24次贏馬，但這晚全季第64次賽事，直至今場才是他今季快活谷第一Win。
體重逾1200磅之大隻仔「幸運歡笑」，今場贏來有啲大話夾好彩，事關如果唔係十三少韋達將「軍歌」留到鬼咁後，姍姍來遲影相輸少少做阿二，以末段兩駒走勢計，頭馬應該落在「軍歌」身上，三、四名分別係18倍冷門「力闖」及190倍全場最冷的「迎風飄揚」，四重彩派17萬幾。

歡迎光臨公仔箱論壇 (http://os.tvboxnow.com/)