公仔箱論壇 - Powered by Discuz! Board

標題: [港澳台] 煉金術啟示錄 [打印本頁]

作者: angel987 時間: 2014-4-21 09:40 AM 標題: 煉金術啟示錄

民建聯籌得六千幾萬，為2016立會選戰囤積糧草，提早幾年在地區推動「蛇齋餅糭糭工程」，無論將來政制點變，也足以穩坐釣魚船。香港政黨政治，因為冇政黨法，政黨接受獻金無規範可言，中聯辦主任張曉明一幅書法為民建聯籌千三萬，幾咁厲害。以往政治獻金多屬低調幕後交易，大地產商唔會咁高調，公然斥鉅款投中聯辦官員字畫作政黨政治捐獻。
一眾香港人在力爭2017無篩選真普選特首之際，有冇諗過民主香港嘅內涵，究竟係乜嘢，我哋嘅生活，同民主發展有何關係？中央駐港官員可以公開為建制派政黨籌措資金、區議會內政府公帑可以求求其就通過輸送比自己友外圍組織，立法會分組點票令民意冇法申張，「三堆一爐」可忽然轉軚幫政府過關。自九一直選，廿幾年下來，民主政治變成一個醬缸，唔單止無助香港向上提升，反而政黨變成一個分配利益、索取利益集團，更得人驚係香港人習以為常，「滑哂牙」，冇反應。
當八十年代尾香港發展代議政制，北京就採取用「時間換取空間」戰略，儘量拖長民主過渡所需時間，將六四後香港人爭取民主決心勇氣消磨殆盡，壓縮民主派空間，Buy time，用長期蛇齋餅糭工程去建立地區勢力、組織樁腳，灌輸一種去政治化嘅社區福利意識形態，呢種長期蹲點工作，背後涉及龐大開支，呢種組織戰成功攻陷一度由泛民佔多數之區議會，成功重點狙擊泛民中生代政客。
另一邊廂泛民靠傳媒力量，用政治議題去反擊，但呢幾年本土傳媒河蟹化程度日高，大家睇吓許智峰抗議區議會閉門撥款不公，有冇傳媒關注？民主離唔開成熟公民社會，民主派政黨多年來以為「選舉」可帶嚟改變，但最終呢個係請君入甕遊戲，參與一場冇賽例之比賽，對手資金及人手無限，行政資源亦向建制派政黨傾斜，不少公帑地區撥款用於椿腳組織活動。建制派有錢有人有大佬，劃分責任選區、配票技術、民調準確性及組織紀律，經過廿年發展，其選舉機器早巳超越停留在1991年嘅泛民。
我真係唔知道，泛民政客點解認為佢地2017年入閘就有機會選到？當前大局係本地公民社會、中產社會、新聞自由一路向後退，政客卻埋首2017政改有deal，為乜？大佬，民主香港係為咗保障公民社會、核心價值、法治人權，而唔係為咗比你地入閘！同樣，冇咗公民社會、新聞自由、中產價值，民主化係冇可能帶來良好管治。
如果要用高度自治換取到2017普選，呢個一定係山寨貨，好大機會爆炸，因為根本唔合常理，也冇邏輯！「皮之不存、毛將焉附」，道理十分顯淺。

歡迎光臨公仔箱論壇 (http://os.tvboxnow.com/)