觀塘工業區路牌「升格」商貿區

政府計劃動用近千億元，將九龍東，即係啟德、觀塘同九龍灣，打造成本港第二個核心商業區。為咗塑造「核心區」形象，起動九龍東辦事處早前提出「短期落實措施」，當中包括逐步更換交通標誌，將九龍東一帶嘅「觀塘工業區」路牌改為「觀塘商貿區」，建立「品牌」咁話，市民如果坐車經過，不妨留意一下。至於其他短期落實措施，包括改善街燈照明，完成觀塘海濱長廊第一、二期，設立起動九龍東辦事處臨時寫字樓等，實行要將呢個工業區大變身。