公仔箱論壇 - Powered by Discuz! Board

標題: 日本版行貨 Noah　變 Look谷偈保王座 [打印本頁]

作者: nt1972 時間: 2010-5-8 06:47 AM 標題: 日本版行貨 Noah　變 Look谷偈保王座

從來要保「一哥」地位嘅壓力都比爭做「阿一」嘅大。貴為 09年 MPV銷量冠軍嘅豐田 Noah想穩守寶座，當然唔可以故步自封，全新 2010年版就引入日本本土版本，頭尾改燈換罩新形象之外，更用上最先進「 VALVEMATIC」引擎技術，加大馬力減低廢氣，有埋慳錢又環保呢兩大實用賣點相助，要戰勝一眾七人車敵手嘅攻略，確實如此直接簡單。

容積不變馬力升級

1.錶板加電鍍邊，又加深藍色刻度及紅色指針，顯示更清晰。

提起 MPV七人車之最，大家可能會第一時間諗起巨無霸 Alphard，不過論車廂舒適、座位編排靈活程度同樣不相伯仲嘅 Noah，似乎憑藉較相宜嘅價錢更吸引一眾愛經濟實惠嘅用家，話佢係近年大熱之選絕非空談，成功取得 2009年 MPV銷量冠軍就係最佳嘅鐵證。要守住一哥地位，加入日本廠方全新開發嘅「 VALVEMATIC」引擎技術就係今次出戰嘅王牌，令全新 Noah於引擎容積不變嘅情況下，卻成功加大 15匹馬力至 158匹、增強 2Nm扭力至 196Nm，全憑最先進嘅「 VALVEMATIC」引擎技術改良引擎結構，令引擎燃油表現有最大嘅發揮。如進氣閥嘅深度加大，令引擎高轉時有充足嘅空氣及燃油進入汽缸燃燒幫助輸出。而進氣閥更會自動調校開關深度，於減速時自行關到最細令油耗相對減低。節汽門嘅打開角度亦比傳統引擎大，加快空氣引入管道加速引擎反應，空氣進入汽缸越快越多，自然可以令燃油燒得更盡，所排放氣體變得更乾淨。

2.以往只得 Sport模式，現改為七速波箱連加減波，令操控更得心應手。

3.獨立冷氣圓圈按鈕加電鍍圈點綴。

■「 VALVEMATIC」引擎透過改良進氣閥改善燃油效益，成功增長 15匹馬力。

■中控等鋪排基本上跟上一代相若， Keep住簡單易用。

迴旋座椅添溫馨
聽完理論課，大家應該最終想知都係 Noah有幾慳油，據代理提供嘅燃油數據，耗油量為 13.9km/L，以每公升汽油$14計算，每公里$1左右，夠晒抵用。但講到引擎幾好力幾慳油都唔夠，因為亦需要波箱嘅配合，棄用比較單一化嘅 Sport按鈕，改用連加減波嘅七速智慧型無段變速波箱，自己控制行車波檔，令負重較大嘅七人車上落斜時更安全稱心。除了內涵改動不少，外形上亦有不少變化，為 Noah帶來新形象，好似全新設計、三橫間粗幼不一嘅鬼面罩，營造更強嘅層次感，微微收窄頭燈嘅闊度，加強頭泵把嘅肌肉感，再加大車頭擾流柵格及霧燈托等設計，都令 Noah更顯得醒目有神。而稍作修改嘅車側裙邊包圍及尾泵把，立體設計同樣為整體視覺效果帶來更大動感。最後數到實用上嘅新增配備，搖控電尾門、自動調校光線角度頭燈及為空氣除菌嘅「離子簇」釋放器等等，都為日常貼身需要而設。不過講到最好玩，我就最鍾意配備側向上落及 180度迴旋功能嘅中排獨立座椅，一家人可以面對面傾偈就夠晒溫馨啦。

■車廂高身寬敞一向係 Noah嘅賣點，每排空位都空間十足。

■只要拉一拉椅下手掣，便可以將座椅轉向車門，方便上落。

■可以 180度迴旋面向後面，好玩又感覺親近。

■重新設計嘅尾燈、定風翼及尾泵把有助強化車尾立體感。

規格
引擎： 1,987cc直四 DOHC VALVEMATIC
馬力： 158PS/6,200rpm
扭力： 196Nm/4,400rpm
傳動：七前速無段變速自動波連+/-
售價：$279,870（七座）

■全新 Noah車頭重新設計，感覺更立體，引擎及波箱亦同樣大革新，力保 MPV第一美譽。

作者: DAYDAY08 時間: 2010-5-8 08:03 PM

提示: 作者被禁止或刪除內容自動屏蔽

作者: yuhin2003 時間: 2010-6-3 08:55 PM

It is my Dream car,好過上一代好多,型都型好多啦

歡迎光臨公仔箱論壇 (http://os.tvboxnow.com/)