公仔箱論壇 - Powered by Discuz! Board

標題: 陳鍵鋒 × Aston Martin學警追車 [打印本頁]

作者: nt1972 時間: 2009-3-15 07:31 AM 標題: 陳鍵鋒 × Aston Martin學警追車

由第一輯《學警雄心》開始，陳鍵鋒（ Sammul ）先做學警，第二輯扮 PTU ，今輯轉做 EU 衝鋒隊，柏翹更爆料話第四輯正準備中。成個警隊做勻晒，再拍容乜易扮埋警務處長？「其實我恨做占士邦多啲，有錢有女有車有槍，最緊要係有型！細細個已經恨有 Aston Martin ，追咗十幾年，睇住佢越改越靚，越靚就越想買！」

企硬揸車唔飲酒

■ 傾慕 007 嘅刺激生活，失驚無神喺車尾掹把槍出嚟，邊個敢同你爭車位？

《學警狙擊》進入高潮，甫見柏翹，忍唔住扮師奶追問劇情，「結局真係唔記得，只可以講好快會同藥煲結婚，不過卻因 Laughing 哥有啲嘢影響到柏翹，而要同老婆離婚，謝天華亦好快會死。」講起 Laughing 哥，現實中因醉駕而被起訴，咁正氣王柏翹又點睇？「首先我覺得天華對事件回應好正面、肯承擔。而我自己出去玩就企得好硬，揸車一定唔飲酒，朋友亦唔會勉強我。真係想飲，最多咪泊過夜再搭的士返屋企囉，都係百零蚊嘅事，你條命點都唔止呢個價啦！」

好有道理喎，咁你幾年前又炒咗架哈仔？「嗰次一樣無飲酒，而且狀態亦唔算差，可能係出隧道一時唔適應光差，最後成架撞到掉轉頭，連轆都飛走埋。之後對隧道有輕微恐懼症，唔敢再揸車而改坐保母車，過隧道時更要拉埋窗簾先安心。三個月後的起心肝揸番車過隧道，誠惶誠恐下走完機隧，其實又唔係想像中咁難克服啫。」

■ Martin 貴在全車均人手裝嵌，科技與藝術嘅結合。

揸 Martin 升格做機師

■ 「 Martin 進化到好高科技，坐上去似機師多過司機。」

陳鍵鋒 o靚仔時已識得 Aston Martin ，「夢想做占士邦，係因為生活多姿多采夠刺激，旗下嘅 DB9 絕對係我終極 Dream Car ，入行時已將佢定為買車目標，令我更努力去工作。今日呢架 V8 Vantage 跟 DB9 一樣充滿英式貴氣，唔似 GT-R 咁飛仔，駕駛艙佈滿 Hi Tech 設備，好多電子掣啪嚟啪去，坐上去感覺似由司機進化成機師，好正！」

跟 DB9 距離仍遠，短期目標想換乜車？「諗緊換 Audi Q7 定寶馬 3 系開篷好， Q7 就試揸過好多次，又載到屋企人同朋友，價錢都好吸引，但 3 系又真係好型好 Powerful ，兩架都咁好，  家仲頭痛緊。」

考牌 10 年，第一架買三菱 Colt 仔，家姐朋友睇中架車， Sammul 乘機換架豐田 Harrier ，炒完之後感到生命可貴，突然許紹雄上身，投入 Benz CL-Class 懷抱，「歐洲車始終硬淨啲， 家架 CL 有跑款又有馬力，我好鍾意，不過屋企人嫌單門車上落麻煩，我先考慮換Q7 咋，不過 3 系我又好鍾意 … … 」真正嘅占士邦，又點會被呢啲婆媽嘢難到？飛張鑽石卡出嚟碌晒兩架啦，仲有， Martin 嘅 08 現貨有優惠。