「老實講，佔中畀嗰三條友不斷重複又重複咁齋講，雷聲大、搵滴雨都冇，曖曖昧昧，一早就唔睇佢地臺戲，加上投票無啦啦整幾條選擇方案，可能我教育程度低，我真係中文都睇唔明，仲叫我撐佢？不過，今晚演完第一場舞台劇後，我就上港大民調網站投咗票。我唔buy佢地，正如我已經唔buy支聯會班友，但我依舊去維園六四晚會，因為哩個係信念，信念係不會被操控嘅，我參加，係凝聚力量，係表達態度。今次投票一樣，係以真正香港人身份表達態度，即使陰謀論將所有網絡攻擊推曬落蘋果或者佔中三條友自導自演，如果係咁都算佢行運，因為，我更加唔想再見到明目張膽官商勾結，亂用市民血汗公帑嚟填補劣政，庸官顛倒是非，公器私用，梁班子衰完一鑊又一鑊仍然用人唯私，警方漸漸成為政治工具，選擇性執法，更甚者竟有疑似戲子差人知法犯法引人犯罪又賊喊捉賊！言論及表達自由不斷收緊，巿民怨聲載道，政府當你冇到！你地仲等乜嘢？仲想衰到點？今日，係真正香港人就集結力量，表達態度，一齊投票！」