公仔箱論壇 - Powered by Discuz! Board

標題: 黄子华栋笃笑里的经典语录~3 [打印本頁]

作者: BillyWay 時間: 2007-9-22 02:00 AM 標題: 黄子华栋笃笑里的经典语录~3

41、读书
我读咁多年书，从来冇一个老师话过俾我听，读书系为乜。
但系我自己识谂，我终於想通：读书系为咗升班。
但系後来有个阿SIR同我哋班同学讲咗句嘢，又令我再谂过。
有一日，佢同我地讲：「你地成班都唔掂，不如你地成班申请留班读好啲书啦！」
我读书系为咗升班，依家留班系为左读好Ｄ书....？

43、银行存款
一个银行存款得4位数字嘅人同一个患咗绝症嘅人系冇分别。
大家都系得几个月命！
我觉得呢啲人可以去申请入院，姑娘问：乜病呀你？
姑娘，我死啦，我谂我有咗四位数字！
啲人话，吸烟危害健康，梗系啦，一包烟几廿皮，食十包，冇左几旧水，唔短几日命？
根本乜嘢都危害健康。睇戏又危害健康，KARAOKE又危害健康......
Shopping？唔好啦，上年shop过一次，差啲过唔到年丫！

44、性教育
有关性教育，父母唔识教，示范识唔识？
佢哋识，但系冇机会示范，因为每晚一到示范时间，阿爸就会话：「九点啦子华，仲唔去瞓？」
九点就叫我去瞓？你估我系农夫呀？
可能佢哋其实唔介意示范，不过唔知道我有咁嘅需要？唔知？！
我日日睇姊妹杂志，真系为咗睇时装呀？
唔知？！根本大家心知肚明，不过诈作不知。
既然大家都咁虚伪，咁以後咪当屋企系社交圈子，大家客客气气咪算罗。
－－爸爸，家母问你今晚番唔番嚟食餐便饭喎？
－－阿妈，你先生话家常便饭唔好打搅你喎。
－－阿细妹，令尊叫你落街买份报纸，点解唔叫我？我系令兄，信唔信令兄掴令寿堂个千金呀？

45、世界和平
呢个世界，乜嘢国家地域主权，其实同去厕所冇分别。
甲：喂，边个喺里面呀，出嚟啦。
乙：我嚟先架！
甲：喂，俾我入嚟丫，一齐丫。
乙：黐线！用厕所都有得一齐？
冇错，如果人类可以习惯一齐用一个厕所，呢个世界就唔会打仗。
啊~~ 你要入嚟呀？等等，我坐过啲，你坐前面，痾唔痾到？

46、赶绝
细路仔都有性需要，但系唔会讲出嚟。
因为佢知道，性呢样嘢，唔可以讲！
因为佢知道，如果佢俾人叫做反斗星，顽皮仔，马骝仔，其实系变相咁俾人赞紧佢聪明仱俐。
但系如果你叫佢做咸湿仔，你就即系赶绝佢。
唔信可以番公司试下：「林小姐，我介绍位新同事你识呀，呢位咸湿仔。」

47、打交
“由细到大我都真是好少同人打交……
因为我认为，你一睇果个人，你一睇距个样啊，就好打过你既，感你无为同距打丫；
而，一睇距个样都吾够你打既，距都仲要同你打……甘距肯定系有秘密武器啦！……”

48、冧吧降
咩叫冧吧降啊？
遮系，有一日，有人比个冧吧你。
你对呢个冧吧除左知道佢系一个冧吧之外，你一无所知。
但系你成副身家掉左落去，个过程好奇妙
“喂，啊子华，俾只坚料你，731。”
“吓，呢个冧吧未听过喔！”
“梗系啦，内幕野来嘎嘛，我上面有人。”
“边，，边，，边度上面啊？”
“中南海，我识得中国第十六把手。”
“边个啊？”
“猪依～”
“甘我训身了!”
“放心啦，有咩打来麦当劳揾我啊，我依家翻夜班啊！”

49、负家产
嗱~~ 大家搞清楚，趸楼系人哋嘅，系叫负资产，好斯文架！
虿楼系自己嘅，就叫负家产！
「你趸负资产点呀？」
「冇提啦！负家产！」
问题系，各位，而家由98年开始，我哋同呢个负家产系咁生活，相处咗5、6年喇，你等佢开始真系对佢怀住一种感情喺度，佢真系成为咗你嘅家喎，咁各位，你而家就明白乜嘢叫做真正嘅“驼衰家”喇。
我哋负家产嘅家就系全世界最眼冤嘅“驼衰家”！
你而家先至明白，原来所谓咩“破碎家庭”系几咁幸福呀。一个“破碎家庭”通常讲紧一个烂赌嘅老窦，一个吸毒嘅细佬咋嘛，一两个驼衰家。
我哋啲负家产，一家都系驼衰家。个厨房又驼衰家，个厕所又驼衰家，我觉得最驼衰家系嗰几个奀挑鬼命嘅窗台！所以系呀，
我系瞌薄嗰几个窗台，我唔买窗帘轲，晒佢啦！驼衰家！
我打麻雀，打输麻雀番嚟咪DUP个地下罗，驼衰家！楼下叫我唔好DUP，我同佢讲，我啲家事关你鬼事呀！
系丫，我而家系捏个墙角，你睇住我捏佢吖，你报警呀！

50、结构性转型
有一日，你男友同你讲，「分手啦！」
你会话：「今次又咩事呀？」
《你男朋友就会更正你喇，有啲唔同，今次.. 上一次..下一次.. 嗰啲一般嘅离离合合，即系每三日讲一次嗰啲，，嗰啲系叫做“周期性分手”。我哋今次系“结构性分手”，由於今次嘅分手系结构性嘅，我愿意一次过俾多啲掟煲费俾你。
如果你肯与呢个自愿性分手计划，我可以再加多3个percent。OK.... 唔同呀！呢次冇得倾，冇得再喺埋一齐架啦，除非.... 你能够作出结构性转型....隆胸。隆胸点讲都算系一种结构性转型呀！》
当一个社会出现一样嘢叫“结构性失业”，即系话俾你听，呢个社会嘅本质基本上系：寡情薄幸，赵完松！
而家系好严重，有啲人长期失业到呢个地步，好耐搵到工，佢就考虑自杀，冇晒信心做人。我认为呢啲朋友，如果你真系谂到要行呢一步，你真系要问下自己，你愿唔愿作出结构性转型先？
囡仕，我讲咗喇，你要隆胸，我唔系讲笑，你隆胸，真系帮到你搵工。我唔请人，但如果你话你隆咗胸，我都想见下你。再填履歴，三只字：“隆了胸”。我包你有面试。
（经理：）「隆了胸？叫佢入嚟.......」
「小姐，你又话隆了胸？好似唔系好觉嘅点解？.....」
（小姐：）「哦~~ 唔系，经理，我哋哈佛毕业嘅，系唔可以太夸张嘅。」
男仕们，你结构边部份要转型呀？
冇错！你何Ｂ！
做艺人做到何守信算系咁啦，我哋最紧张嗰部份改咗你个名呀，几鬼尊敬你。我都期望第日，过几年啲阿爸教仔踢波：「人哋射死球，最紧要扲住阿子华呀！」.... 「你咪俾人拉西拉亲阿子华呀！」哗~~~ 咁就骄傲呀！但今时今日，仲系何Ｂ叻啲。我哋中国人素来有呢种傅统，每一个朝代大量人失业嘅时候.... 结构性转型....做太监。有好多後嚟做咗CEO架。而事实上，太监系令人成熟得最快嘅行业嚟架啦，一刹那之前你仲系一个靓仔，一刹那之後，你就系公公啦！..........

51、轮回
你要帮啲想自杀嘅人，你就系要话俾佢听，生命系有take 2嘅，仲有take 3, take 4... 无限take.... 你想逃避食屎，你走去自杀，你就会轮回番嚟喺深水埗个公厕度出世，头三年都冇人理你，你自己搵嘢食啦......
我系真系相信有轮回，我仲知道轮回嗰条方程式系乜嘢。轮回嘅方程式就系.... 如果你自杀，你就会轮回番嚟做你仇人嘅囝囡。你自杀，你轮回番嚟就要叫你啲仇人做嗲哋，妈咪~~~
我有好多朋友好锡啲囝囡，但好多时啲囝囡会因为啲好少嘅问题同佢讲：我憎你！
「小明，未做晒功课唔凖睇电视！」
「我憎你！...........」

52、人寿保险从业员
我唔知你地点，我每次见完呢D卖保险既人呢，我都会帮佢买份保险，好合作！
因为我每次见完佢地，我都真系觉得命都短几年嘎。因为佢地讲野呢唔系一般人果种逻辑嘎！
你同佢讲“喂，唔系呢，陈生，我呢几个月呢，呢几个月都完全无时间嘎！”
“哦，唔紧要，你今晚有无半个钟啊？”
“唔系啊，遮系我有朋友做保险嘎，我帮佢买左份保险嘎了。”
“哦，唔紧要，我唔介意嘎～”
“你明唔明啊？我全屋都系做保险嘎，全家人都系卖保险嘎！”
“系啊，依家好多人做保险嘎！”
你无办法讲得佢地明嘎！

53、读得书少
我反而好欣赏李小龙另外一句说话，对我影响就真系好大喇，喺精武门临死之前佢讲过一句说话佢就系话：我读得书少，（握拳伸出食指在面前划几下，一个李小龙的经典动作)你唔好呃我!
我细个最怕就系读得书少咖喇啊嘛，阿sir一问：你读过书未？嘿……读咗读咗，原来读得书少都可以咁有型咖？
喔，以后就唔同啰，一到考试，“我读得书少，阿sir，你唔好考我!”（笑声)
生活任何一方面都啱用嘅，“我读得书少，（握拳伸出食指在面前划几下，一个李小龙的经典动作)你唔好呃我!啲橙点卖啊？”
我亦都希望我哋嘅人大代表上去上面开会嘅时候，开开吓会突然间有个走上张台度话“我读得书少，（握拳伸出食指在面前划几下，一个李小龙的经典动作)你唔好呃我!一小撮人即系几多人啊？”

54、星探
当然就系想以最理想嘅方法加入娱乐圈啰。
最理想嘅方法系乜嘢啊？俾星探发现啰!
我成日发梦有啲咁嘅事会出现，有日行吓街，忽然间有个人拍拍你膊头“先生你想唔想做戏啊？”
“如果唔系做主角我觉得冇乜必要讨论落去!”
“嗬，咁呢层就当然啦!片酬方面就唔好过七位数字咁多!”
“钱，唔系最重要嘅。你边个做导演啊？”
“喔，就今年呢个啱罗金像奖嘅王家卫啱唔啱你啊？”
“等我谂吓，好啦，横掂呢二卅年我都得闲嘅!”
即系应该系咁上下啊嘛，所以咧我就即刻开始咗我喺弥敦道朝九晚五俾星探发现嘅工作喇!

55、养狗
我养狗，我有罪，还养了超过35CM高的,我对不起党，对不起全国人民，我破坏了和谐社会,影响了国家的安定繁荣

56、开心
唔知点解唔开心,最令你唔开心既系明明你本来系好开心
你唔明点解花左大半日建立起黎既开心会无啦啦变左唔开心,所以你好唔开心

作者: sakenken 時間: 2007-9-22 03:12 AM

:onion14: :onion14: 顶楼主,谢谢楼主发那么好的贴,希望楼主再接再厉

作者: ls_siew 時間: 2008-1-23 12:53 PM

thanks for sharing

作者: caroltam 時間: 2008-1-23 02:19 PM

thanks for sharing

歡迎光臨公仔箱論壇 (http://os.tvboxnow.com/)