杜Sir球會球迷齊力撐！自從重返晏菲路後，杜格利殊帶領利物浦戰績節節上升，表現咁好終於獲紅軍提供一紙合約，落實嚟緊3年擔任全職領隊。此外，適逢4月15日係希斯堡球場慘劇22周年紀念日，慘劇嘅死難者家屬就力撐當年同樣擔任領隊嘅杜Sir應得獲封爵，以表揚佢對死難者家屬嘅支持，足證佢深得球迷好戴。
希斯堡慘劇家屬撐封爵
自從鶴臣1月離隊後，重返利物浦嘅杜格利殊一直只擔任看守領隊。不過英國《太陽報》尋日爆料，指呢位60歲老帥已經同意擔任球會全職教頭，預計將同助教史堤芬奇勒一樣獲簽約3年，英國傳媒估計利物浦將喺季尾正式公布呢單喜訊。
隨住成功留低，杜格利殊亦開始重組班底，首要任務就係挽留門將連拿，事關呢位門將一早暗示如果下季冇得踢歐聯就會另謀高就，盛傳阿仙奴睇到佢實。為留連拿，杜Sir一講佢就「直豎拇指」：「我一直覺得連拿係依家英超最佳門將，任何球會想簽一位比佢更勁嘅門將真係好難。」杜Sir甚至將連拿同利物浦前名將基利文斯相提並論：「基利文斯係紅軍最佳門將之一，連拿依家嘅水準拍得住佢，但今晚對阿仙奴我絕對唔會用基利文斯，因為佢今年已經60歲，我覺得連拿勁好多！」
| 歡迎光臨 公仔箱論壇 (http://os.tvboxnow.com/) | Powered by Discuz! 7.0.0 |