歐霸盃上周中完成第5輪分組賽後，4支參戰嘅意甲球隊有3支出局，剩番嘅拿玻里亦危在旦夕，意甲嘅歐洲足協聯賽系數勢已被拖低，到2012/13球季，幾可肯定意甲嘅歐聯席位會由4席減至3席。

眼見德甲來勢洶洶，已淪為歐洲第4聯賽嘅意甲為挽回頹勢，已作出多方面改革，例如加設更多開賽時段，奈何球迷唔多受落，對待盃賽更係相當冷淡，日前多場喺意大利舉行嘅歐霸盃主場賽事，入場人數少得可憐，冇人撐難怪作客球隊表現仲醒神過主隊。

歐戰唔掂，本土賽事亦都一鑊粥，本來意盃16強賽事安排喺本周四及下周二舉行，森多利亞及祖雲達斯等下周要兼顧歐霸盃嘅球隊，理論上要喺本周中先踢意盃，但直至昨晚，8場16強比賽都唔知幾時舉行，或者過埋年先至再打算，連咁基本嘅賽程安排都咁混亂，意大利足球真係神仙難救，嚟緊周末又傳出球員罷踢，難怪香港嘅收費電視都寧願主打西甲。

馬會尋晚亦公布咗世冠盃冠軍賠率，當中國際米蘭被視為奪標大熱，希望「藍黑軍團」可以打好呢個比賽，重振意甲聲威啦！

如果再係咁，遲ｄ四大聯賽無意甲份架啦！